మిస్ శెట్టి మిస్టర్ పోలిశెట్టి.. అనుష్క శెట్టి, నవీన్ పోలిశెట్టి ప్రధాన పాత్రల్లో నటించిన సినిమా. అనుష్క చెఫ్‌ పాత్రలో నటించింది. నవీన్ స్టాండప్ కమెడియన్ పాత్రలో కనిపించబోతున్నాడు. మహేష్‌ బాబు డైరెక్ట్ చేసిన ఈ చిత్రాన్ని యూవీ క్రియేషన్స్ బ్యానర్ నిర్మించింది. ఎప్పుడో షూటింగ్ పూర్తి చేసుకున్నా.. రిలీజ్ విషయంలో నిర్మాణ సంస్థ ఒక క్లారిటీకి రావడానికి నానా తంటాలు పడింది. ఆగస్ట్ 4న విడుదల చేస్తాం అని ప్రకటించారు. కానీ ఆ టైమ్ కు రాలేకపోయాడు. దీంతో ఆగస్ట్ 18 లేదా 25న విడుదల చేస్తారు అనే ప్రచారం జరిగింది. ఆ డేట్స్ లో పెద్దగా పోటీ కూడా లేదు. అందువల్ల సరైన నిర్ణయమే అవుతుందనుకున్నారు.
ఈ లోగా సెప్టెంబర్ 7న వస్తుందనే రూమర్స్ వచ్చాయి. ఆ రోజు షారుఖ్ ఖాన్ నటించిన జవాన్ విడుదల కాబోతోంది. ఇప్పటికే ఈ మూవీపై దేశవ్యాప్తంగా భారీ అంచనాలున్నాయి. ఆ సినిమాక పోటీగా రావడం మిస్ అండ్ మిస్టర్ శెట్టి చేసే సాహసం అన్నారు. బట్ వీళ్లు ఎవరి మాటా విన్నట్టు కనిపించడం లేదు. అందుకే శ్రీ కృష్ణాష్టమినే ఫిక్స్ చేసుకున్నారు.
మిస్ శెట్టి మిస్టర్ పోలిశెట్టిని సెప్టెంబర్ 7న విడుదల చేయబోతున్నారు. ఈ మేరకు మూవీ టీమ్ నుంచి మరోసారి అఫీషియల్ అనౌన్స్ మెంట్ వచ్చింది. విశేషం ఏంటంటే.. జవాన్ లాంటి భారీ సినిమా ఉన్నా.. వీళ్లు కూడా ఈ చిత్రాన్ని ప్యాన్ ఇండియన్ మూవీగానే రిలీజ్ చేస్తున్నారు. మరి అనుష్క తప్ప ప్యాన్ ఇండియన్ మూవీ అనేందుకు ఏ అట్రాక్షన్ లేని ఈ చిత్రానికి ఆ స్థాయిలో ఆదరణ ఉంటుందా అంటే డౌటే అని చెప్పాలి. అయితే ఈ రిలీజ్ డేట్ కోసం ప్లాన్ చేసిన వీడియో మాత్రం బావుందని చెప్పాలి. నవీన్ పోలిశెట్టి జాతకం చూపిస్తూ సినిమా రిలీజ్ డేట్ గురించి అడగటం తమ మీద తామే సెటైర్ వేసుకున్నట్టుగా ఉంది.
