మల్టీస్టారర్స్ చేయడానికి నేను రెడీ.. శ్రీవిష్ణు

శ్రీవిష్ణు గారు ముందుగా మీకు ఆల్ ది బెస్ట్. ‘ఓం భీమ్ బుష్‘ సినిమా ప్రచార చిత్రాలకు చాలా మంచి రెస్పాన్స్ వచ్చింది. సినిమా ఎలా ఉండబోతుంది?
‘ఓం భీమ్ బుష్‘తో ఇప్పుటివరకూ ఎవరూ టచ్ చేయని ఓ కొత్త పాయింట్ చెప్పబోతున్నాం. ఈ సినిమాలో ఎంటర్ టైన్ మెంట్ ఉంటుంది, థ్రిల్లింగ్ ఎపిసోడ్స్ ఉంటాయి. ఒక విధంగా ఇదొక మల్టీజానర్ మూవీ అని చెప్పొచ్చు. టోటల్ మూవీని ఎంటర్ టైనింగ్ వేలో చెప్పాం. అందరూ ఈ సినిమా చూసి ఎంటర్ టైన్ అవుతారు.

కథ అనుకున్నప్పుడే ‘ఓం భీమ్ బుష్‘ టైటిల్ అనుకున్నారా?
కథ అనుకున్నప్పుడు టైటిల్ అనుకోలేదు. ఈ సినిమాకోసం మొదట మావాళ్లంతా కొన్ని ఇంగ్లీష్ టైటిల్స్ అనుకున్నారు. అయితే.. నేను మాత్రం ఈ చిత్రానికి తెలుగు టైటిల్ ఉండాలని పట్టుబట్టాను. అలా.. నా ప్రోద్భలంతోనే ‘ఓం భీమ్ బుష్‘ టైటిల్ వచ్చింది. సినిమా ఫస్ట్ కట్ చూసిన తర్వాతే ‘ఓం భీమ్ బుష్‘ టైటిల్ డిసైడ్ చేశాము.

మీ గత సినిమాలన్నింటిలో టైటిల్స్ కి మీరు చాలా ప్రాముఖ్యత ఇస్తారు?
అవును.. టైటిల్స్ గురించి నేను ప్రత్యేకంగా ఆసక్తి చూపిస్తాను. టైటిలే ముందు ఆడియన్స్ కి కనెక్ట్ అవుతుంది. అందుకే.. నా సినిమాల టైటిల్స్ విషయంలో నేను కూడా ఎక్కువగా కసరత్తులు చేస్తాను.

‘ఓం భీమ్ బుష్‘ ఓ సరికొత్త కాన్సెప్ట్ తో వస్తుంది అంటున్నారు? మరి.. ఆడియన్స్ కి కనెక్ట్ అవుతుందనుకుంటున్నారా?
బేసిగ్గా.. ఇలాంటి స్టోరీస్ ను స్క్రిప్ట్ చదివి డిసైడ్ చెయ్యలేం. కంప్లీట్ గా ఆర్టిస్టుల పెర్ఫామెన్స్ ల మీదే ఆధారపడి ఉంటుంది. ఇలాంటి పాయింట్ ఎప్పుడూ రాలేదు కాబట్టి.. ఇది ఇలా వర్కవుట్ అవుతుందని తెలీదు. అయితే.. ఎప్పుడూ కొత్తదనం కోరుకునే ప్రేక్షకులకు ఈ సినిమా ఖచ్చితంగా నచ్చుతుంది అనుకుంటున్నాను.

ఒక స్క్రిప్ట్ సెలక్ట్ చేసుకున్నప్పుడు మీ మార్కెట్ కాపాడుకోవడానికి మీరు ఏ అంశాలను పరిగణనలోకి తీసుకుంటారు?
సీరియస్ గా చెప్పాలంటే నేను మార్కెట్ గురించి ఏమాత్రం ఆలోచించను. మార్కెట్ పెరగాలి అనేది ప్రతి ఒక్కరూ కోరుకునేదే. అయితే.. నేను చూసేదేమిటంటే పెట్టిన పెట్టుబడి పోకూడదని. నిర్మాతను దృష్టిలో పెట్టుకుని.. ఎంచుకున్న కథ ఎంత ఇంపాక్ట్ ఇస్తుందో.. దానికి తగ్గట్టే బడ్జెట్ ను పెట్టమని కోరతాను. అయితే.. ఈ సినిమా వరకూ పెట్టిన పెట్టుబడికి మూడు, నాలుగు రెట్లు డబ్బులు వచ్చాయి. ఈమధ్య కాలంలో యు.వి.క్రియేషన్స్ కి ఇంత పెద్ద రాబడి రావడం నా సినిమాతోనే.

‘బ్రోచేవారెవరురా‘లో మీ ముగ్గురు కాంబో అదిరిపోయింది. మళ్లీ ‘ఓం భీమ్ బుష్‘లో మీరు ముగ్గురు ఎలా నవ్వించబోతున్నారు?
మేము ముగ్గురూ ఎప్పుడు కలుస్తూనే ఉంటాము. ఈ సినిమాలో ఎక్కువగా ఒన్ లైనర్స్ ఉంటాయి. మేము బయట ఎలా అయితే ఒన్ లైనర్స్ వేసుకుంటామో.. అలాగే ఈ మూవీలోనూ చేశాము. ఫస్టాప్ లో మూడు బ్లాక్స్, సెకండాఫ్ లో ఓ రెండు బ్లాక్స్ హిలేరియస్ గా ఉంటాయి.

టెక్నికల్ టీమ్ గురించి ఏం చెప్తారు?
డైరెక్టర్ శ్రీహర్ష సినిమాని చాలా బాగా హ్యాండిల్ చేశాడు. ఈ సినిమాకి కొత్త కలర్స్ తీసుకొచ్చాడు. ఇక.. సినిమాటోగ్రాఫర్ రాజ్ తోట నేను ఆరు సినిమాలు చేశాను. మ్యూజిక్ డైరెక్టర్స్ సన్నీ తోనూ చాలా కాలం నుంచి పరిచయం ఉంది. అతను మూడేళ్ల గ్యాప్ తర్వాత చేస్తున్న సినిమా ఇది. ఇక.. హ్యాపీ ప్రొడక్షన్ హౌస్. టెక్నికల్ గా అయితే సినిమా చాలా బాగుంటుంది. ముఖ్యంగా ఈ సినిమా ఆర్ట్ డైరెక్టర్ శ్రీకాంత్ గురించి చెప్పాలి. రేపు అతని వర్క్ ను వెండితెరపై చూస్తే మీరే చెప్తారు. భవిష్యత్తులో అతను చాలా బిజీ ఆర్ట్ డైరెక్టర్ గా మారతాడు.

ఈ సినిమా హీరోయిన్స్ ఎక్కువగా బయట కనిపించడం లేదు?
నా గత చిత్రాల తరహాలోనే ఈ సినిమాలోనూ నా హీరోయిన్ కి మంచి ప్రాముఖ్యత ఉంటుంది. అయితే.. ఎక్కువ స్క్రీన్ స్పేస్ మేం ముగ్గురమే కనిపిస్తాము. ఈ సినిమాలో కమిట్ అయిన వెంటనే హీరోయిన్స్ కి వేరే ఆఫర్స్ వచ్చేశాయి. ఒకరేమో బిగ్ బాస్ కి వెళ్లిపోయారు. మరొకరికి మరో పెద్ద ఆఫర్ వచ్చింది. అలా.. వాళ్లంతా బిజీ అయిపోయారు.

ఈ సినిమా షూటింగ్ ఎక్స్ పీరియన్స్ గురించి చెప్పండి?
ఈ సినిమాలోని పల్లెటూరి ఎపిసోడ్ కోసం పూణె వెళ్లాము. అక్కడ నేను, దర్శి, రాహుల్ ముగ్గురూ లొకేషన్ దగ్గర్లోనే స్టే చేశాము. అక్కడ పొలాల్లో తిరుగుతూ మేము ముగ్గురూ కలిసి ఓ పదిహేను రోజులు ఉన్నాము. అది చాలా మంచి ఎక్స్ పీరియన్స్. షూటింగ్ అయితే చాలా బాగా ఎంజాయ్ చేశాము.

మీ ఫ్యూచర్ ప్రాజెక్ట్స్ ఏంటి?
‘స్వాగ్‘ దాదాపు అయిపోయింది. ఇంకొక వారంలో కంప్లీట్ అవుతుంది. తర్వాత ఒక థ్రిల్లర్ చేస్తున్నాను. ఆ సినిమా తర్వాత గీతా ఆర్ట్స్ లో ఒక సినిమా ఉంటుంది.

మల్టీస్టారర్స్ చేసే ఛాన్స్ వస్తే చేస్తారా?
మంచి కథ వస్తే హండ్రెడ్ పర్సెంట్ చేస్తాను. నేను క్యారెక్టర్స్ నుంచి మొదలుపెట్టాను. ఆ తర్వాత హీరోగా మారాను. ఏ హీరోతోనైనా మంచి స్టోరీ దొరికినా.. మంచి కాంబినేషన్స్ దొరికినా.. నేను చేయడానికి అయితే రెడీ