ఎన్నికలు దగ్గరపడుతున్న వేళ రాజకీయ నేపథ్య సినిమాల జోరు ఉంటూనే ఉంటుంది. ఈకోవలోనే.. ఆంధ్రప్రదేశ్ ఎన్నికలు, లోక్ సభ ఎన్నికలు సమీపిస్తున్న ఈ తరుణంలో ముఖ్యమంత్రి జగన్ మోహన్ రెడ్డి ఇతివృత్తంతో ఒకేసారి రెండు సినిమాలు రూపొందాయి. వాటిలో ఒకటి ‘వ్యూహం’ అయితే.. మరొకటి ‘యాత్ర 2’. ఇప్పటికే రామ్ గోపాల్ వర్మ దర్శకత్వం వహించిన ‘వ్యూహం’ చిత్రానికి సెన్సార్ సర్టిఫికెట్ వచ్చినా.. హైకోర్టు ఆ సర్టిఫికెట్ ను రద్దు చేసింది. ఇప్పుడు ‘యాత్ర 2’ వంతొచ్చింది.
‘యాత్ర’ సినిమాకి సీక్వెల్ గా ‘యాత్ర 2’ని తెరకెక్కించాడు డైరెక్టర్ మహి వి రాఘవ్. ఫిబ్రవరి 8న ఈ చిత్రాన్ని విడుదల చేయడానికి సన్నాహాలు జరుగుతున్నాయి. అయితే.. ఆంధ్రప్రదేశ్ రాష్ట్రంలో అధికారంలో ఉన్న వై.యస్.ఆర్.పార్టీకి, అలాగే ఆ పార్టీ అధినేత, ముఖ్యమంత్రి వై.ఎస్‌ జగన్‌మోహన్‌రెడ్డికి పూర్తిగా అనుకూలంగా ఈ సినిమాను తీశారని నిర్మాత, డిస్ట్రిబ్యూటర్ నట్టికుమార్ ఆరోపిస్తూ.. సెంట్రల్ బోర్డు ఆఫ్ ఫిలిం సర్టిఫికేషన్ చైర్ పర్సన్, సీఈఓ, హైదరాబాద్ రీజినల్ సెన్సార్ ఆఫీసర్ కు లెటర్ రాశారు.
తెలుగుదేశం పార్టీకి, అలాగే ఆ పార్టీ అధినేత నారా చంద్రబాబు నాయుడుకు, కాంగ్రెస్‌ పార్టీ జాతీయ అధినేత సోనియాగాంధీకి వ్యతిరేకంగా ‘యాత్ర 2’ని తీయడంతో పాటు వారి పాత్రలను కించపరుస్తూ, వ్యంగ్యంగా ఈ చిత్రంలో చిత్రీకరించారని నట్టికుమార్ తన లెటర్ వివరించారు. తెలుగు రాజకీయ కథా చిత్రం ‘యాత్ర-2’ సెన్సార్ ను లోక్ సభ ఎన్నికల తర్వాతే చేయాలన్న అభిప్రాయాన్ని నట్టి కుమార్ వ్యక్తంచేశారు. ఆమధ్య ‘వ్యూహం’ సినిమా సెన్సార్ విషయంలో నట్టికుమార్ ఇలాగే లెటర్ రాశారు. ఇప్పుడు ‘యాత్ర 2’ సెన్సార్ ని ఆపాలని లెటర్ రాయడం విశేషం.
