ఆస్కార్ వేడుకలో ‘ఓపెన్‌హైమర్’కి అవార్డుల పంట

ప్రపంచవ్యాప్తంగా సినీ ప్రియులు ఎంతో ఆసక్తిగా ఎదురుచూసే వేడుక ఆస్కార్ అవార్డులు. లాస్ ఏంజిల్స్ లోని డాల్బీ థియేటర్ లో ఈ వేడుక అట్టహాసంగా జరిగింది. ఆస్కార్ అవార్డ్స్ -2024 విజేతల పేర్లను అకాడమీ ప్రకటించింది. బ్లాక్ బస్టర్ హిట్ ‘ఓపెన్‌హైమర్’కు 96వ ఆస్కార్ అవార్డుల్లో అవార్డుల పంట పండింది.

హాలీవుడ్ లో ‘ది బ్యాట్ మ్యాన్’ సిరీస్, ‘ఇన్సెప్షన్, ఇంటర్ స్టెల్లార్, డన్‌కిర్క్, టెనెట్’ వంటి అద్భుతమైన చిత్రాలను అందించిన క్రిస్టోఫర్ నోలన్ రూపొందించిన చిత్రమే ‘ఓపెన్‌హైమర్’. అణుబాంబు తయారీలో కీలక పాత్ర పోషించిన అమెరికా శాస్త్రవేత్త ‘రాబర్ట్ జె ఓపెన్ హైమర్’ జీవిత చరిత్ర ఆధారంగా ఈ చిత్రం తెరకెక్కింది. బ్లాక్ బాస్టర్ విజయం సాధించిన హాలీవుడ్ మూవీ ‘ఓపెన్‌హైమర్’.. ఉత్తమ చిత్రంగా నిలవడమే కాకుండా ఉత్తమ దర్శకుడిగా క్రిస్టోఫర్ నోలన్, ఉత్తమ నటుడుగా సిలియన్ మర్ఫీ, ఉత్తమ సహాయ నటుడిగా రాబర్ట్ డౌనీ జూనియర్, ఉత్తమ ఒరిజినల్ స్కోర్ కి లుడ్విక్ గోరాన్సన్ అవార్డులు అందుకున్నారు.

ఉత్తమ నటిగా ‘పూర్ థింక్స్’ చిత్రానికి గానూ ఎమ్మా స్టోన్ అవార్డు అందుకోగా.. ఉత్తమ సహాయ నటిగా ‘ది హోల్డోవర్స్’ చిత్రానికి గానూ డా వైన్ జాయ్ రాండోల్ఫ్ అవార్డు అందుకున్నారు. ఇండియా నుంచి డాక్యుమెంటరీ ఫీచర్ ఫిలిం కేటగిరీలో అవార్డు బరిలో నిలిచిన ‘టు కిల్‌ ఏ టైగర్‌’కు నిరాశే మిగిలింది.

అవార్డుల విజేతలు
ఉత్తమ చిత్రం – ఓపెన్‌హైమర్
ఉత్తమ దర్శకుడు: క్రిస్టోఫర్ నోలన్ (ఓపెన్‌హైమర్)
ఉత్తమ నటి: ఎమ్మా స్టోన్ (పూర్ థింక్స్)
ఉత్తమ నటుడు: సిలియన్ మర్ఫీ (ఓపెన్‌హైమర్‌)
ఉత్తమ సహాయ నటి: డా’వైన్ జాయ్ రాండోల్ఫ్ (ది హోల్డోవర్స్)
ఉత్తమ సహాయ నటుడు: రాబర్ట్ డౌనీ జూనియర్ (ఓపెన్‌హైమర్)
ఉత్తమ ఒరిజినల్ స్క్రీన్ ప్లే: జస్టిన్ ట్రైట్, ఆర్థర్ హరారీ (అనాటమీ ఆఫ్ ఏ ఫాల్)
ఉత్తమ అడాప్టెడ్ స్క్రీన్ ప్లే: కార్డ్ జెఫెర్సన్ (అమెరికన్ ఫిక్షన్)
ఉత్తమ అంతర్జాతీయ ఫీచర్: ది జోన్ ఆఫ్ ఇంట్రెస్ట్ (యూకే)
ఉత్తమ యానిమేటెడ్ ఫీచర్: ది బాయ్ అండ్ ది హెరాన్

ఉత్తమ ఒరిజినల్ స్కోర్: లుడ్విగ్ గోరాన్సన్ (ఓపెన్‌హైమర్)
ఉత్తమ ఒరిజినల్ సాంగ్: బిల్లీ ఎలిష్, ఫిన్నియాస్ ఓ’కానెల్ (బార్బీలోని వాట్ వాజ్ ఐ మేడ్ ఫర్? సాంగ్‌కి)
ఉత్తమ డాక్యుమెంటరీ ఫీచర్: 20 డేస్ ఇన్ మారియుపోల్
ఉత్తమ డాక్యుమెంటరీ షార్ట్: ది లాస్ట్ రిపేర్ షాప్
బెస్ట్ లైవ్ యాక్షన్ షార్ట్: ది వండర్ ఫుల్ స్టోరీ ఆఫ్ హెన్రీ షుగర్
ఉత్తమ యానిమేటెడ్ షార్ట్: వార్ ఈజ్ ఓవర్!
బెస్ట్ సౌండ్: ది జోన్ ఆఫ్ ఇంట్రెస్ట్
ఉత్తమ ప్రొడక్షన్ డిజైన్: పూర్ థింగ్స్
బెస్ట్ ఫిల్మ్ ఎడిటింగ్: ఓపెన్‌హైమర్
ఉత్తమ కాస్ట్యూమ్ డిజైన్: పూర్ థింగ్స్
బెస్ట్ హెయిర్ అండ్ మేకప్: పూర్ థింగ్స్
ఉత్తమ సినిమాటోగ్రఫీ: ఓపెన్‌హైమర్
ఉత్తమ విజువల్ ఎఫెక్ట్స్: గాడ్జిల్లా మైనస్ వన్