మన స్టార్ హీరోలు తమ కెరీర్ లో మైల్ స్టోన్ మూవీస్ ను ఎంతో ప్రతిష్ఠాత్మకంగా భావిస్తుంటారు. వంద సినిమాల మైలురాయి అనేది ప్రతీ హీరో కల. టాలీవుడ్ సీనియర్స్ లో ఇప్పటికే చిరంజీవి, బాలకృష్ణ ఆ మైల్ స్టోన్ ని అధిగమించారు. ఇప్పుడు నాగార్జున వంతొచ్చింది. సంక్రాంతి బరిలో ‘నా సామిరంగ’ చిత్రంతో మంచి విజయాన్నందుకుని.. మళ్లీ ఫుల్ ఫామ్ లోకి వచ్చేశాడు కింగ్ నాగార్జున. ప్రస్తుతం శేఖర్ కమ్ముల దర్శకత్వంలో ఓ సినిమా చేస్తున్న నాగార్జున.. ఆ తర్వాత తన వందో సినిమాని పట్టాలెక్కించనున్నాడట.
తమిళంలో విజయ్ ఆంటోని, అరుణ్ విజయ్ కాంబోలో ‘అగ్ని సిరగుగల్’ సినిమా తీసిన నవీన్.. నాగార్జున సెంచరీ మూవీని తెరకెక్కించబోతున్నట్టు తెలుస్తోంది. ఈ సినిమాని పాన్ ఇండియా లెవెల్ లో రూ.100 కోట్లకు పైగా బడ్జెట్ తో రూపొందించడానికి సన్నాహాలు చేస్తున్నారట. తమిళ నిర్మాత జ్ఞానవేల్ రాజా ఈ చిత్రాన్ని నిర్మించనున్నట్టు తెలుస్తోంది. త్వరలోనే నాగార్జున 100వ చిత్రానికి సంబంధించి అధికారిక ప్రకటన రానుందట.
