అక్కినేని యువ సామ్రాట్ నాగచైతన్య తన అసిస్టెంట్ కి సడెన్ సర్పైజ్ ఇచ్చాడు. తన స్టాఫ్ పై ఎంతో ఔదార్యాన్ని చూపించే చైతూ.. ‘తండేల్’ సెట్స్ లో తన పర్సనల్ అసిస్టెంట్ వెంకటేష్ బర్త్ డే ని గ్రాండ్ గా జరిపాడు. ఈ వేడుకలో హీరోయిన్ సాయిపల్లవితో పాటు డైరెక్టర్ చందూ మొండేటి కూడా పాల్గొన్నారు. ప్రస్తుతం అందుకు సంబంధించిన వీడియో నెట్టంట చక్కర్లు కొడుతుంది.
ఆన్ స్క్రీన్ పై నాగచైతన్య, సాయిపల్లవి క్యూట్ పెయిర్. ‘లవ్ స్టోరీ‘ చిత్రంతో ప్రేక్షకుల్ని ప్రేమలోకంలో విహరింపజేసిన ఈ జంట.. మరోసారి ‘తండేల్’ కోసం జోడీ కట్టారు. ఈ సినిమాలో రాజు పాత్రలో చైతన్య జాలరిగా కనిపించబోతుండగా.. అతని ప్రియురాలిగా బుజ్జి పాత్రలో సాయిపల్లవి అలరించబోతుంది. ఆమధ్య వాలెంటైన్స్ డే స్పెషల్ గా ఈ మూవీ నుంచి రిలీజైన స్పెషల్ వీడియో అందరినీ ఆకట్టుకుంటుంది. ఇంకా.. ‘ఎస్సెన్స్ ఆఫ్ తండేల్’ అంటూ వదిలిన టీజర్ కూడా ఈ చిత్రంపై విపరీతమైన బజ్ ఏర్పరచింది. ఈసారి పాన్ ఇండియా లెవెల్ లో ‘తండేల్’తో సత్తా చాటబోతున్నాడు చైతన్య. ప్రస్తుతం ఈ సినిమా శరవేగంగా చిత్రీకరణ జరుపుకుంటుంది.
