వెంకటేష్ అన్ని తరహా పాత్రలు పోషించగల సత్తా ఉన్న నటుడు. అందుకే యంగ్ డైరెక్టర్స్ నుంచి సీనియర్ డైరెక్టర్స్ వరకూ వెంకటేష్ తో సినిమా చేయడానికి ఉత్సాహాన్ని చూపిస్తుంటారు. ఈకోవలోనే యంగ్ డైరెక్టర్ తరుణ్ భాస్కర్ కూడా వెంకటేష్ కోసం ఓ సబ్జెక్ట్ సిద్ధం చేశాడు. సురేష్ ప్రొడక్షన్స్ లో ‘ఈ నగరానికి ఏమైంది’ సినిమా తర్వాత ఈ చిత్రం సెట్స్ పైకి వెళ్లాల్సి ఉంది. అయితే ఏమైందో ఏమో ఈ ప్రాజెక్ట్ పక్కకు వెళ్లింది.
తాజాగా ‘కీడా కోలా’ ప్రమోషన్స్ లో వెంకటేష్ తో సినిమా గురించి ప్రస్తావించాడు తరుణ్ భాస్కర్. వెంకటేష్ తో స్పోర్ట్స్ బ్యాక్ డ్రాప్ లో ఓ కథ సిద్ధం చేశానని.. అది సురేష్ బాబుకి కూడా నచ్చడంతో షూటింగ్ కి వెళ్లిపోవచ్చు అని ఆయన కూడా గ్రీన్ సిగ్నల్ ఇచ్చారన్నాడు. అయితే.. స్టోరీ సెకండాఫ్ తనకు శాటిస్పేక్షన్ ఇవ్వలేదని.. అందుకే ఆ ప్రాజెక్ట్ కి బ్రేక్ పడిందన్నాడు. అయితే.. కచ్చితంగా వెంకటేష్ తో ఆ సినిమాని పట్టాలెక్కిస్తానని చెప్పాడు తరుణ్ భాస్కర్.
