‘ధమాకా‘ తర్వాత డైరెక్టర్ నక్కిన త్రినాథరావు నిర్మాతగా బిజీ అయ్యారు. తన నక్కిన నేరేటివ్స్ బ్యానర్ పై వరుస సినిమాలను నిర్మించడానికి సన్నాహాలు చేస్తున్నారు. ఈకోవలోనే నక్కిన త్రినాథరావు నిర్మాణంలో ప్రొడక్షన్ నెం.2 ముహూర్తాన్ని జరుపుకుంది. నక్కిన త్రినాథరావు కథ అందిస్తూ నిర్మిస్తున్న ఈ చిత్రంలో లగడపాటి శ్రీధర్ తనయుడు రాహుల్ సహిదేవ్ హీరోగా నటిస్తున్నాడు. ‘దృశ్యం‘ చిత్రంలో వెంకటేష్ చిన్న కూతురుగా నటించిన ఎస్తేర్ అనిల్ ఈ మూవీలో హీరోయిన్.
ఈ చిత్రానికి వంశీ కృష్ణ మళ్ల దర్శకత్వం వహిస్తున్నారు. ఆంధ్రా బ్యాక్ డ్రాప్ లో యాక్షన్ ఎంటర్ టైనర్ గా ఈ చిత్రం తెరకెక్కనుందట. ఈ సినిమాలో తారక్ పొన్నప్ప మరో కీలక పాత్రలో కనిపించనున్నారు. ఈ సినిమాకి దావంద్ సంగీతాన్ని సమకూరుస్తుండగా.. ప్రవీణ్ పూడి ఎడిటర్ గా వ్యవహరిస్తున్నాడు. ఈ సినిమా ముహూర్తపు సన్నివేశానికి హీరో సందీప్ కిషన్ క్లాప్ కొట్టగా.. శరత్ మరార్ కెమెరా స్విఛ్ఛాన్ చేశారు. హీరో సుమంత్ గౌరవ దర్శకత్వం వహించారు.
