జూలై 26న రాబోతున్న ధనుష్ ‘రాయన్‘

ఈతరం కథానాయకుల్లో రెండుసార్లు ఉత్తమ నటుడిగా జాతీయ అవార్డు అందుకోవడం అంటే మామూలు విషయం కాదు. అలాంటి అసాధ్యాన్ని సుసాధ్యం చేసినవాడు విలక్షణ నటుడు ధనుష్. కేవలం కథానాయకుడుగానే కాకుండా నిర్మాతగా, దర్శకుడిగానూ తన ప్రతిభ చాటుతూనే ఉంటాడు ధనుష్. ఇప్పటికే తన డైరెక్షన్ లో తొలి చిత్రం ‘పవర్ పాండి’తో భారీ విజయాన్నందుకున్నాడు. ఇప్పుడు ‘రాయన్’ సినిమాతో డైరెక్టర్ గా రెండో ప్రయత్నం చేస్తున్నాడు. ఈ సినిమాలో సందీప్ కిషన్, కాళిదాస్‌ జయరామ్‌, ఎస్.జె.సూర్య, సెల్వ రాఘవన్, దుషారా విజయన్ ఇతర కీలక పాత్రలు పోషిస్తున్నారు.

ఇప్పటికే చివరిదశకు చేరుకున్న ‘రాయన్‘ జూన్ 13నే విడుదలవ్వాల్సి ఉంది. అయితే.. పోస్ట్ ప్రొడక్షన్ పనులు ఆలస్యమవ్వడంతో ఈ చిత్రాన్ని జూలై 26న విడుదల చేయబోతున్నారట. అందుకు సంబంధించి అఫీషియల్ పోస్టర్ రిలీజ్ చేసింది టీమ్. ఇక.. నార్త్ మద్రాస్ బ్యాక్ డ్రాప్ లో సాగే ఈ సినిమాని సన్ పిక్చర్స్ నిర్మిస్తుంది. ఈ చిత్రానికి ఆస్కార్ విజేత ఏ.ఆర్.రెహమాన్ సంగీతాన్ని సమకూరుస్తున్నాడు. ఈ సినిమా నుంచి రిలీజైన సాంగ్స్ కు మంచి రెస్పాన్స్ దక్కింది.