కమెడియన్స్ హీరోలుగా మారుతోన్న ట్రెండ్ అనాది నుంచి ఇప్పటికీ జోరుగానే కొనసాగుతోంది. అయితే.. హీరోలుగానే కాదు కొంతమంది కమెడియన్స్ డైరెక్టర్స్ గానూ సత్తా చాటుతున్నారు. గతంలో పద్మనాభం వంటి కమెడియన్స్ డైరెక్టర్స్ గా మారి మంచి విజయాలందుకున్నారు. ఆ తర్వాత ఎ.వి.ఎస్., వెన్నెల కిషోర్ వంటి వారు ఈ ప్రయత్నం చేసినా పెద్దగా ఫలించలేదు.
కమెడియన్ నుంచి డైరెక్టర్ గా మారి సంచలన విజయాన్నందుకున్నాడు వేణు. ‘జబర్దస్త్’ వేణుగానే ఎక్కువ మందికి పరిచయమున్న ఈ కమెడియన్ ‘బలగం‘ చిత్రంతో భారీ విజయాన్నందుకున్నాడు. అంతేకాదు ‘బలగం‘ సినిమా జాతీయ, అంతర్జాతీయంగా పలు అవార్డులు కూడా అందుకుంది.
వేణు బాటలోనే మరో ‘జబర్దస్త్‘ కమెడియన్ ధన్ రాజ్ కూడా మెగాఫోన్ పట్టబోతున్నాడట. ఈమధ్య సినిమాల స్పీడు తగ్గించిన ధన్ రాజ్ ఓ స్క్రిప్ట్ సిద్ధం చేసుకున్నాడట. ఈ సినిమాలో నటించే హీరో మరెవరో కాదు విలక్షణ నటుడు సముద్రఖని.
‘విమానం‘ సినిమాలో సముద్రఖనితో పాటు ధన్ రాజ్ కూడా నటించాడు. ఆ సమయంలోనే సముద్రఖనికి ఓ ఫీల్ గుడ్ స్టోరీ వినిపించాడట ధన్ రాజ్.
ఆ సబ్జెక్ట్ నచ్చడంతో సినిమా చేయడానికి సముద్రఖని ఓ.కె. చెప్పాడట. దసరా నుంచే ధన్ రాజ్ డైరెక్ట్ చేసే మూవీ సెట్స్ పైకి వెళ్లబోతున్నట్టు వినిపిస్తోంది. తెలుగుతో పాటు తమిళంలోనూ బైలింగ్వల్ గా ఈ చిత్రం తెరకెక్కనుందట.
