నేచురల్ స్టార్ నాని తన 30వ చిత్రంగా ‘హాయ్ నాన్న‘ చేశాడు. ప్రస్తుతం 31గా ‘సరిపోదా శనివారం’ వస్తోంది. ఈ సినిమా చిత్రీకరణలో ఉండగానే లేటెస్ట్ గా తన 32వ చిత్రాన్ని ప్రకటించాడు. ‘సరిపోదా శనివారం’ సినిమాని నిర్మిస్తోన్న డివివి ఎంటర్ టైన్ మెంట్స్ నిర్మాణంలోనే నాని 32 కూడా ఉండబోతుంది. ‘సాహో’ ఫేమ్ సుజీత్ ఈ చిత్రానికి దర్శకత్వం వహిస్తున్నాడు.
నాని బర్త్ డే స్పెషల్ గా ఈ క్రేజీ కాంబో మూవీకి సంబంధించి అఫీషియల్ అనౌన్స్ మెంట్ వచ్చింది. అంతేకాదు.. ‘వాట్ ఇఫ్ వైలెంట్ మ్యాన్ టర్న్స్ నాన్-వైలెంట్?’ అంటూ ఈ సినిమా కాన్సెప్ట్ వీడియోని కూడా విడుదల చేశారు. ఈ వీడియో చూస్తే ఓ కొత్త జోనర్ లో నానిని సుజీత్ ప్రెజెంట్ చేయబోతున్నట్టు అర్థమవుతోంది.
ప్రస్తుతం ‘సరిపోదా శనివారం’ చివరిదశకు చేరుకుంది. ఆగస్టులో ఈ సినిమా ఆడియన్స్ ముందుకు రాబోతుంది. మరోవైపు పవన్ కళ్యాణ్ ‘ఓజీ’ని కాసేపు పక్కనపెట్టి నాని 32ని త్వరలోనే పట్టాలెక్కించడానికి సిద్ధమవుతున్నాడట సుజీత్. ‘ఓజీ’ నిర్మించేది సేమ్ బ్యానర్ కాబట్టి నాని చిత్రం షూటింగ్ కి ఏమాత్రం ఇబ్బంది ఉండే అవకాశం లేదు.
