తెలుగు రాష్ట్రాలలో రాజకీయ వేడి పెరిగింది. ఈనేపథ్యంలో.. ప్రజల్లో రాజకీయ చైతన్యం కలిగించేలా వస్తోంది ‘ప్రతినిధి 2’ చిత్రం. నారా రోహిత్ హిట్ మూవీ ‘ప్రతినిధి’కి సీక్వెల్ గా రూపొందిన చిత్రమిది. సీనియర్ జర్నలిస్ట్ మూర్తి తెరకెక్కించిన ఈ సినిమా నుంచి ఇప్పటికే విడుదలైన ప్రచార చిత్రాలకు మంచి రెస్పాన్స్ వచ్చింది. లేటెస్ట్ గా ఈ మూవీ నుంచి ట్రైలర్ రిలీజ్ చేశారు మేకర్స్.
‘మన స్వాతంత్ర్యం కోసం పోరాడిన గాంధీజీ చనిపోయినప్పుడు ఎంతమంది సూసైడ్ చేసుకున్నారు.. ఎంతమంది గుండెపోటుతో చచ్చారు..’ అనే ఆలోచింపజేసే డైలాగ్ తో మొదలైన ట్రైలర్ ఆద్యంతం ఆకట్టుకుంటుంది. ఈ మూవీలో జర్నలిస్ట్ పాత్రలో రోహిత్ కనిపించబోతున్నాడు. అతను పొలిటీషియన్ అజయ్ ఘోష్ ని ఇంటర్యూ చేసినప్పుడు.. అతను చెప్పే ‘కొండమీద కొబ్బరికాయలు అమ్మా.. బండి మీద బత్తాయిలు అమ్మా.. ‘ అనే డైలాగ్స్ కూడా ప్రెజెంట్ పొలిటీషియన్స్ కు అద్దం పట్టేలా ఉన్నాయి. సిరీ లీల, దినేష్ తేజ్, సప్తగిరి, జిషు సేన్ గుప్తా, సచిన్ ఖేడేకర్, తనికెళ్ల భరణి, ఉదయ్ భాను వంటి భారీ తారాగణం నటిస్తున్న ఈ సినిమాని వానర ఎంటర్ టైన్ మెంట్స్, రానా ఆర్ట్స్ బ్యానర్స్ నిర్మిస్తున్నాయి. ఈ చిత్రానికి కుమార రాజా బత్తుల, ఆంజనేయులు శ్రీ తోట, సురేంద్రనాథ్ బొల్లినేని నిర్మాతలు. మహతి స్వర సాగర్ ఈ మూవీకి మ్యూజిక్ కంపోజ్ చేస్తున్నాడు. ఏప్రిల్ 25న ‘ప్రతినిధి 2’ విడుదలకు ముస్తాబవుతోంది.
