గ్లోబల్ స్టార్ రామ్ చరణ్, భారీ చిత్రాల దర్శకుడు శంకర్ కలయికలో రూపొందుతోన్న చిత్రం ‘గేమ్ ఛేంజర్’. టాలీవుడ్ స్టార్ ప్రొడ్యూసర్ దిల్ రాజు అత్యంతం భారీ బడ్జెట్ తో తన సంస్థలో 50వ చిత్రంగా ఈ సినిమాని నిర్మిస్తున్నాడు. తమన్ సంగీతాన్నందిస్తున్న ఈ చిత్రం నుంచి ఫస్ట్ సింగిల్ ను దసరా కానుకగా విడుదల చేస్తారనే ప్రచారం జరిగింది.
అయితే ‘గేమ్ ఛేంజర్’ సింగిల్ కి సంబంధించిన అనౌన్స్ మెంట్ ను మాత్రమే దసరా కానుకగా అందించారు. దివాళి సందర్భంగా ఈ సినిమా నుంచి ‘జరగండి’ అంటూ సాగే గీతాన్ని విడుదల చేయబోతున్నారు. అందుకు సంబంధించి ఓ కలర్ ఫుల్ పోస్టర్ ను విడుదల చేసింది టీమ్. చుట్టూ రంగు రంగుల ఇళ్ల మధ్య.. లంబాడీ వేషధారణలో ఉన్న మహిళలు చరణ్ కి స్వాగతం చెబుతున్నట్టున్న ఈ పోస్టర్ ఆకట్టుకుంటుంది. రామ్ చరణ్ చేతిలో పుస్తకం పట్టుకున్న తీరును చూస్తుంటే ఈ మూవీలో ఐ.ఎ.ఎస్. ఆఫీసర్ గా కనిపించే అతనికి ఆ మహిళలు స్వాగతం చెబుతున్నట్టు ఉంది ఈ స్టిల్. శంకర్ స్టైల్ లోనే అత్యంత భారీగా కనిపిస్తున్న ఈ పోస్టర్ ఆద్యంతం ఆకట్టుకుంటుంది.
