తెలుగు ఫిల్మ్ జర్నలిస్ట్ అసోసియేషన్ కి రూ.5 లక్షలు ఆర్థిక సహకారం అందించింది ఉత్తర అమెరికా తెలుగు సంఘం (NATS). యాంకర్ సుమ కనకాల ద్వారా NATS.. తెలుగు ఫిల్మ్ జర్నలిస్ట్ అసోసియేషన్ కి ఈ సహాయాన్ని అందించింది. ప్రతీ పండగకి ఏదైనా మంచి కార్యక్రమం చేయాలనే తలంపుతో సుమ కనకాల ఏర్పాటు చేసిన సంస్థ ఫెస్టివల్స్ ఫర్ జాయ్. ఈ సంస్థ ద్వారా NATS అందించిన ఆర్థిక సహాయాన్ని మధ్య వారధిగా నిలబడి తెలుగు ఫిల్మ్ జర్నలిస్ట్ అసోసియేషన్ కి అందజేశారు సుమ. ఈ సహాయం మాత్రమే కాదు NATS వారు కోట్ల రూపాయల్లో అవసరమైన వారికి సహాయం చేస్తున్నారని ఈ సందర్భంగా సుమ తెలిపారు.
తెలుగు ఫిల్మ్ జర్నలిస్ట్ అసోషియేస్ లో ఉన్న 180 మంది సభ్యుల హెల్త్ ఇన్సూరెన్స్ కి ఈ మొత్తాన్ని ఉపయోగిస్తామని ఫిల్మ్ జర్నలిస్ట్ అసోసియేషన్ ప్రధాన కార్యదర్శి వై.జె.రాంబాబు తెలిపారు. తెలుగు ఫిల్మ్ జర్నలిస్ట్ అసోసియేషన్ లోని సభ్యులకు అందిస్తున్న ఇన్సూరెన్స్ పాలసీల గురించి వై.జె.రాంబాబు.. సుమ కనకాల కు వివరించారు. ఈ సందర్భంగా సుమతో పాటు NATS సభ్యులు శ్రీధర్ అప్పసాని, అరుణ గంటి, బాపు నూతి, ప్రశాంత్ పిన్నమనేని, రాజ్ అల్లాడ లకు కృతఙ్ఞతలు తెలిపింది తెలుగు ఫిల్మ్ జర్నలిస్ట్ అసోసియేషన్.
