ప్రస్తుతం పవన్ కళ్యాణ్ పూర్తిచేయాల్సిన సినిమాలు మూడున్నాయి. అవే.. ‘హరిహర వీరమల్లు, ఓజీ, ఉస్తాద్ భగత్ సింగ్’. అయితే.. ఈ చిత్రాలలో ముందుగా మొదలైంది ‘హరిహర వీరమల్లు’. ఈ సినిమా ప్రారంభం జరుపుకుని నాలుగేళ్లు పూర్తయ్యింది. ఈనేపథ్యంలో.. ముందుగా ‘హరిహర వీరమల్లు’ని పూర్తిచేయడానికి సిద్ధమవుతున్నాడట పవన్ కళ్యాణ్.
హిస్టారికల్ బ్యాక్‌డ్రాప్ తో ‘హరిహర వీరమల్లు’ చిత్రాన్ని అత్యంత భారీ బడ్జెట్ తో ఎ.ఎమ్.రత్నం నిర్మిస్తున్నారు. తొలుత దర్శకుడు క్రిష్ కొంతభాగాన్ని తెరకెక్కించిన ఈ సినిమాని ఇప్పుడు ఎ.ఎమ్.రత్నం తనయుడు జ్యోతికృష్ణ పూర్తిచేస్తున్నారు. రెండు భాగాలుగా రాబోతున్న ‘హరిహర వీరమల్లు’ ఫస్ట్ పార్ట్ ‘స్వార్డ్ వర్సెస్ స్పిరిట్’ ను ఈ సంవత్సరమే ప్రేక్షకుల ముందుకు తీసుకురానున్నట్టు ప్రకటించారు.
డిసెంబర్ లో ‘హరిహర వీరమల్లు-1’ని తీసుకురావాలనే ఆలోచనలో ఉన్నారట మేకర్స్. ఈనేపథ్యంలో.. ఈ ఆగస్టు నుంచి ఈ సినిమా షూటింగ్ లో పవన్ పాల్గొననున్నట్టు తెలుస్తోంది. పవన్ కళ్యాణ్ ఈ మూవీ కోసం కేవలం 20 నుంచి 25 రోజులు సమయం కేటాయిస్తే సరిపోతుందట. ఆస్కార్ విజేత కీరవాణి ఈ సినిమాకి సంగీతాన్ని సమకూరుస్తున్నాడు. మరోవైపు.. ఈ సినిమాకి సంబంధించిన విజువల్ ఎఫెక్ట్స్ పనులు శరవేగంగా పూర్తవుతున్నాయి.
