‘సలార్‘ విడుదలకు ఇంకా కేవలం 12 రోజులు మాత్రమే ఉంది. చిత్రబృందం ప్రచారం విషయంలో ఎలాంటి హడావుడి చేయకపోయినా.. సైలెంట్ గా విడుదలకు సంబంధించిన పనులన్నీ పూర్తిచేస్తున్నారు. లేటెస్ట్ గా ‘సలార్‘ మూవీ సెన్సార్ ఫార్మాలిటీస్ కంప్లీట్ అయ్యాయట. ఈ చిత్రానికి ‘ఎ‘ సర్టిఫికెట్ జారీ చేసిందట సెన్సార్ బోర్డ్. గతంలో ప్రశాంత్ నీల్ డైరెక్ట్ చేసిన ‘కె.జి.యఫ్‘ సిరీస్ రెండు చిత్రాలకు ‘యు/ఎ‘ సర్టిఫికేట్స్ వచ్చాయి. ఇప్పుడు ‘సలార్‘ మాత్రం పెద్దలకు మాత్రమే అన్న కేటగిరీలో ఉండబోతుంది. అందుకు ముఖ్య కారణం ఈ సినిమాలో చూపించే రక్తపాతమే.
‘సలార్‘ రన్ టైమ్ 2 గంటల 55 నిమిషాల 22 సెకన్లు అని తెలుస్తోంది. ఇటీవలే రిలీజైన ట్రైలర్ కి సూపర్బ్ రెస్పాన్స్ వచ్చింది. ఇప్పటివరకూ ఇండియాలో ఏ సినిమా ట్రైలర్ కూడా సాధించనటువంటి వ్యూస్ రికార్డును ఇది నెలకొల్పింది. త్వరలోనే ఇంకొక ట్రైలర్ ను విడుదల చేసే సన్నాహాల్లో ఉందట టీమ్. ప్రభాస్ ఆద్యంతం కనిపించేలా ఆ యాక్షన్ ట్రైలర్ ను కట్ చేస్తున్నారట. ఈ సినిమాలో పృథ్వీరాజ్, శ్రుతి హాసన్, జగపతిబాబు, బాబీ సింహా, శ్రీయ రెడ్డి, ఈశ్వరిరావు, టినూ ఆనంద్ ఇతర కీలక పాత్రల్లో కనిపించబోతున్నారు. హోంబలే ఫిల్మ్స్ రూ.400 కోట్ల భారీ బడ్జెట్ తో ఈ సినిమాని నిర్మించింది.
