ఆర్ఆర్ఆర్.. ఇప్పుడు సినీ అభిమానుల నోట్లో బాగా నానుతున్న మూవీ టైటిల్ ఇదే. యంగ్ టైగర్ ఎన్టీఆర్, మెగా పవర్ స్టార్ రామ్ చరణ్ ల క్రేజీ కాంబినేషన్లో దర్శకధీరుడు రాజమౌళి అత్యంత ప్రతిష్టాత్మకంగా తెరకెక్కించారు. ఈరోజు ఆర్ఆర్ఆర్ ట్రైలర్ రిలీజ్ అయ్యింది. ఈ ట్రైలర్ కు ట్రెమండస్ రెస్పాన్స్ వచ్చింది. ఎన్ని అంచనాలతో వచ్చినా అంతకు మించి ఆర్ఆర్ఆర్ ఉంటుందని అనే నమ్మకాన్ని ట్రైలర్ కలిగించింది.
ఇదిలా ఉంటే.. ఈ భారీ సినిమా టోటల్ రన్ టైం ఎంత అనేది బయటకు వచ్చింది. ఇంతకీ ఎంతంటే.. మొదటి నుంచి వినిపించినట్టుగానే ఈ సంచలన చిత్రం రన్ టైమ్ 3 గంటలకు పైనే ఉన్నట్టుగా సెన్సార్ బోర్డ్ ద్వారా తెలిసింది. ఇంకా చెప్పాలంటే.. ఈ చిత్రం మొత్తం 3 గంటల 6 నిమిషాల 54 సెకండ్లు వచ్చిందట. అలాగే సెన్సార్ బోర్డ్ వారు ఈ చిత్రానికి యూ/ ఏ సర్టిఫికెట్ ఇచ్చినట్లు కూడా తెలిసింది.
రాజమౌళి సినిమా రన్ టైమ్ 3 గంటలే కాదు 5 గంటలు ఉన్నా చూస్తారు. ఎందుకంటే.. ఆయన టేకింగ్, యాక్షన్ ఎపిసోడ్స్, ఎమోషన్ అంతలా ఆడియన్స్ ని కట్టిపడేసాలా ఉంటాయి. అందుచేత 3 గంటలకు పైగా రన్ టైమ్ ఉన్నా ఏం ఫరవాలేదు అని అందరి నోట వినిపిస్తుంది. బాహుబలి రికార్డులను ఆర్ఆర్ఆర్ క్రాస్ చేయడం ఖాయం అనే టాక్ బలంగా ఉంది. మరి.. ఆర్ఆర్ఆర్ సినిమాతో రాజమౌళి మరోసారి చరిత్ర సృష్టిస్తారేమో చూడాలి.