వారం వారం థియేటర్లలో కొత్త సినిమాల సందడి కొనసాగుతూనే ఉంది. పోయిన వారం థియేటర్లలోకి ‘గ్యాంగ్స్ ఆఫ్ గోదావరి, భజే వాయు వేగం, గం గం గణేశా’ వంటి మూడు సినిమాలొచ్చాయి. ఇక.. ఈ వారం నాలుగు సినిమాలు ప్రేక్షకుల ముందుకు రాబోతున్నాయి. అవే.. ‘మనమే, సత్యభామ, లవ్ మౌళి, రక్షణ’.
![](https://telugu70mm.com/wp-content/uploads/cwv-webp-images/2024/06/Untitled-1-1.jpg.webp)
ముందు నుంచీ ప్రచారంలో లేకపోయినా సడెన్ గా జూన్ 7న విడుదల తేదీ ఖరారు చేసుకున్న చిత్రం ‘మనమే’. శర్వానంద్ హీరోగా శ్రీరామ్ ఆదిత్య దర్శకత్వంలో ఈ సినిమా రూపొందింది. ఆద్యంతం యూరప్ బ్యాక్డ్రాప్ లో రొమాంటిక్ ఎంటర్ టైనర్ గా ఈ చిత్రాన్ని తీర్చిదిద్దాడట డైరెక్టర్ శ్రీరామ్ ఆదిత్య. ఈ సినిమాలో శర్వానంద్ కి జోడీగా కృతి శెట్టి నటించింది. పీపుల్ మీడియా ఫ్యాక్టరీ నిర్మాణంలో రూపొందిన ఈ మూవీకి హేషబ్ అబ్దుల్ వాహబ్ సంగీతాన్ని సమకూర్చాడు. పవన్ కళ్యాణ్ ‘ఖుషి’, మహేష్ బాబు ‘మురారి’ తరహాలో రొమాంటిక్ ఎంటర్ టైనర్ గా ‘మనమే’ ఆకట్టుకుంటుందని చెబుతోంది చిత్రబృందం.
![](https://telugu70mm.com/wp-content/uploads/cwv-webp-images/2024/06/GO9v_pRW8AE0-rY.jpg.webp)
ఈ వారం వస్తోన్న చిత్రాలలో కాజల్ అగర్వాల్ ‘సత్యభామ’ ఒకటి. కాజల్ పవర్ ఫుల్ పోలీసాఫీసర్ పాత్రలో నటించిన చిత్రమిది. సుమన్ చిక్కాల దర్శకత్వంలో మరో దర్శకుడు శశికిరణ్ తిక్క ఈ సినిమాని నిర్మించడం విశేషం. ఇప్పటికే ‘సత్యభామ’ కోసం కాజల్ ఫుల్ స్వింగ్ లో ప్రమోషన్స్ నిర్వహించింది. ఈ సినిమా ట్రైలర్ ను నటసింహం బాలకృష్ణ విడుదల చేశారు. ఇక.. ఈవారం శర్వానంద్ ‘మనమే’తో పాటు ‘సత్యభామ’ కూడా హాట్ ఫేవరెట్ గా రంగంలోకి దిగుతోంది.
![](https://telugu70mm.com/wp-content/uploads/cwv-webp-images/2024/06/GOPxt7xX0AABMDq.jpg.webp)
కాస్త గ్యాప్ తర్వాత నవదీప్ హీరోగా నటించిన చిత్రం ‘లవ్ మౌళి’. అసలు ఏప్రిల్ 19నే విడుదలవ్వాల్సిన ఈ చిత్రం అనివార్య కారణాల వలన ఆలస్యమవుతూ వచ్చింది. జూన్ 7న ‘లవ్ మౌళి’ థియేటర్లలోకి వస్తోంది. శ్రీకర స్టూడియోస్ సమర్పణలో C స్పేస్, నైరా క్రియేషన్స్ సంయుక్తంగా ఈ చిత్రాన్ని నిర్మిస్తున్నాయి. నవదీప్ ఇప్పటివరకూ చేయనటువంటి ఓ ప్రయోగాత్మకమైన పాత్రను ఈ చిత్రంలో చేశాడట. అవనీంద్ర దర్శకత్వం వహించిన ఈ మూవీకి గోవింద్ వసంత సంగీతాన్ని సమకూర్చాడు.
![](https://telugu70mm.com/wp-content/uploads/cwv-webp-images/2024/06/GOPfXO5WcAAU89m.jpg.webp)
కాజల్ ‘సత్యభామ’ తరహాలోనే పవర్ ఫుల్ పోలీసాఫీసర్ పాత్రతో.. లేడీ ఓరియెంటెడ్ గా రాబోతున్న మరో మూవీ ‘రక్షణ’. పాయల్ రాజ్పుత్ ఈ సినిమాలో పోలీసాఫీసర్ పాత్రలో నటించింది. హరిప్రియ క్రియేషన్స్ బ్యానర్పై ప్రణదీప్ ఠాకోర్ దర్శకత్వం వహిస్తూ ఈ చిత్రాన్ని నిర్మించారు. ఇటీవలే ఈ సినిమా గురించి పాయల్ వివాదాస్పద వ్యాఖ్యలు చేయడం జరిగింది. అలాగే.. ఈ సినిమా ప్రచారానికి పాయల్ రావడం లేదని నిర్మాత ప్రొడ్యూసర్ కౌన్సిల్ కి వెళ్లడం జరిగింది. ఎట్టకేలకు ఈ సినిమాని జూన్ 7న విడుదల చేస్తున్నారు.
![](https://telugu70mm.com/wp-content/uploads/cwv-webp-images/2024/06/GO5PB7bXYAAosry.jpg.webp)