టాలీవుడ్‌లో ప్రతిష్టాత్మకంగా తెరకెక్కుతున్న చిత్రాలలో ‘కన్నప్ప’ ఒకటి. మంచు విష్ణు హీరోగా నటిస్తున్న ఈ భారీ బడ్జెట్ చిత్రాన్ని బాలీవుడ్ దర్శకుడు ముఖేష్ కుమార్ సింగ్ తెరకెక్కిస్తున్నాడు. పూర్తి స్థాయి పౌరాణిక చిత్రంగా రూపొందుతున్న ఈ సినిమాని మంచు విష్ణు ఎంతో ప్రతిష్టాత్మకంగా తీసుకుని, ప్రతి విషయంలోనూ పర్ఫెక్ట్‌గా ఉండేలా చూసుకుంటున్నారు.
ఇంతకుముందు ‘కన్నప్ప’ చిత్రాన్ని డిసెంబర్‌లో విడుదల చేస్తామని చిత్ర యూనిట్ ప్రకటించింది. అయితే తాజాగా మంచు విష్ణు ఈ సినిమాను డిసెంబర్‌లో విడుదల చేయడం లేదని స్పష్టం చేశారు. తిరుమల శ్రీ వేంకటేశ్వర స్వామిని దర్శించుకున్న సందర్భంగా మీడియాతో మాట్లాడుతూ ‘కన్నప్ప చిత్రాన్ని డిసెంబర్‌లోనే విడుదల చేయాలని ప్లాన్ చేశాం.. కానీ కొన్ని అనివార్య కారణాల వల్ల ఈ చిత్రాన్ని 2025 సమ్మర్‌లో తీసుకొస్తున్నాం’ అని తెలిపారు.
ఈ భారీ బడ్జెట్ చిత్రంలో మోహన్ బాబు, శరత్ కుమార్, ముఖేష్ రిషి, బ్రహ్మానందం వంటి వారు ప్రధాన పాత్రల్లో నటిస్తున్నారు. అంతేకాకుండా మోహన్ లాల్, అక్షయ్ కుమార్, ప్రభాస్, కాజల్ అగర్వాల్ వంటి వారు కేమియోలలో మురిపించనున్నారు. ఇటీవల ఈ సినిమా నుంచి ప్రభాస్‌కి సంబంధించిన లుక్ సోషల్ మీడియాలో లీక్ అవడంతో చిత్రబృందం అలెర్ట్ అయ్యింది. త్వరలోనే.. ప్రభాస్ లుక్ ను అధికారికంగా రివీల్ చేయనుంది.
